1986-1989 jılları alıp barılǵan arxeologiyalıq qazıw jumıslarınıń barısında Xalifa Erejeptiń fasad diywallarınıń aldında birneshe ımaratlardan ibarat kompleksi tazalandı.

Komplekstiń sxeması jayǵa kiriw qapısına tutasqan tórt muyeshli háwli (8, 35 x3, 7 m) tiykarında qurılǵan. Háwliniń shıǵıs tárepinde bir neshe bólme bolǵan. 1-xananıń jaylasıwına qaraǵanda (poldıń bir bólegi tas gerbish penen órilgen, suwdı tógiw ushın arnayı jeri bar) bul bólme dáretxana ushın arnalǵan bolǵan. Itimal, qońsılas ımaratlar turar-jay bolǵan bolıwı múmkin. Shama boyınsha, háwliniń batıs tárepinde (bul tárepi qazilmaǵan) de ımaratlar bar. Dáwirlestiriwge baylanıslı materiallardıń jetispewshiligi bul komplekstiń qurılıs waqtın anıqlawdı qıyınlastıradı. Itimal, ol XV ásirdiń birinshi yarımında qurılǵan bolıwı múmkin.

Onıń payda bolıwı estelikten maqbara retinde paydalanıwdaǵı jańa sharayatlardı sáwlelendiredi hám bul imarattı saqlaw hám ziyaratshılardıń oǵan keliwin tártipke salıw zárúrlikleri menen vaylanıslı bolıwı múmkin (Xalifa Erejeptiń tariyxınıń úshinshi basqıshı).

Fasad diywalinıń wayran bolıwı, onıń qulawı fasad diywalına tutas jaylar kompleksin basıp qalǵan hám olardıń ómir súriwin toqtatqan. Sha menen sol dáwirde gúmbezdiń qulawı Xalifa Erejeptiń maqbara retinde xızmet etiw tariyxın juwmaqlaydı. Bul XVII-XVIII ásirlerde júz bergen dep shama qılıw múmkin.

Maqbara ishinde jáne onıń aldında alıp barılǵan qazıw jumısları keyin bul jay hám onıń átirapındaǵı qarabaxanalar muqaddes orın sıpatındaǵı áhmiyetin joytpaǵan. Bul jerler musılman dástúrine bola jerlew hám ábir ústi jaylar salıw (saǵana) ushın paydalanila baslaǵan (Xalifa Erejeptiń tariyxınıń tórtinshi basqıshı).