Ótkerilgen konservaciya jumıslarınan maqset - turistler hám zıyarachılar ushın tiykarǵı tartımlı orın bolıp qalıp atırǵan teńi-tayı joq orta ásirler esteliginiń wayran bolıw processlerin páseytiw hám saqlanıw jaǵdayın turaqlastırıwdan ibarat.

Konservaciya jumıslarınan aldın estelikti tereń úyreniw hám hújjetlestiriw jumısları ámelge asırıldı. 3D skanerlew, foto hám videofiksaciya, geodeziyalıq súwretke alıw, geomagnitlik skanerlew, arxeologiyalıq shurflardı qurıw - estelikte qollanılǵan keń kólemli aldıńǵı usıl hám kózqaraslardıń tek ǵana bir bólegi.

Jıynalǵan, qayta islengen hám sistemalastırılǵan maǵlıwmatlar konservaciyalawdıń jumısshı joybarına tiykar boldı.
Estelikti talqılaw hám tolıq sáwlelendiriw, keń jámiechiliktiń xabardarlıǵın arttırıw, tariyxıy-mádeniy miyrastı qorǵaw hám úgit-násiyatlaw tarawında jumıs alıp barıp atırǵan jergilikli kadrlardıń potencialın arttırıw máselelerine ayrıqsha itibar qaratıldı.

Xalifa Erejep maqbarasın turaqlastırıw hám konservaciyalaw boyınsha bul joybar Ózbekstan Respublikasındaǵı AQSh elshixanasınıń járdeminde 2023-jılı Mádeniy baylıqlardı qorǵaw boyınsha elshilik qorı (AFCP) sheńberindegi grant qarjıları esabınan baslanǵan edi.

Jumıslardı ámelge asırıwda Ózbekstan Respublikasınıń 2001-jıl 30-avgusttaǵı 269-II-sanlı "Mádeniy miyras obektlerin qorǵaw hám olardan paydalanıw haqqında"ǵı Nızamı, Ózbekstan Respublikasınıń 2009-jıl 13-oktyabrdegi 229-sanlı "Arxeologiyalıq miyras obektlerin qorǵaw hám olardan paydalanıw haqqında"ǵı Nızamı hám basqa da qollanılatuǵın normativlik-huqıqıy hújjetlerge sózsiz ámel etiledi.